Светската цена на шеќерот во февруари порасна за 6,9 отсто во однос на претходниот месец и достигна највисоко ниво во последните 6 години. Ова повторно создава конфузија на пазарот бидејќи многу индустрии зависат од шеќерот како суровина. Доколку тој тренд продолжи, може да се очекуваат нови поскапувања, исто како и пред крајот на 2022 година.
На ваквиот пораст на цената на шеќерот влијаеше послабата побарувачка во Индија и несигурноста за производствените капацитети.
Експертите немаат добра прогноза ниту за цената на шеќерот во Европа, бидејќи од Франција доаѓаат лоши вести за енормно намалување на површините под шеќерна репка.
– Сушата, болестите и одлуката на судот на Европската унија за забрана на пестицид што се користи за заштита на шеќерната репка резултираа со помали засадени површини. И производителите и преработувачите се загрижени дали ќе има доволно шеќер – велат тие.
Голема неизвесност околу производството дополнително се зголеми со одлуката на судот на ЕУ кој ја поништи претходната одлука на француската влада да дозволи уште една година употреба на забранетите инсектициди. Многу земјоделци купиле семе од шеќерна репка пред одлуката на ЕУ. Француската шеќерна група „Кристал унион“ ја зголеми цената за овогодинешниот откуп по пресудата поради стравувањата од пад на производството.
Истовремено, во последните месеци цените на шеќерот во Европа достигнаа рекордни вредности. Последните податоци покажуваат дека во декември тон шеќер чинеше 655 евра, што е за 56% повеќе во споредба со истиот период пред една година
