Меѓународниот комитет на Црвениот крст (МКЦК) потврди дека тројца негови членови биле убиени во четвртокот откако гранати го погодиле местото на планираната дистрибуција на помош на фронтот во регионот на Доњецк, пишува Гардијан.
Двајца дополнителни членови на персоналот на МКЦК се повредени, се вели во соопштението.
МКЦК додаде дека дистрибуцијата на хуманитарна помош не е започната и дека ниеден жител не бил погоден од експлозијата.
Иако украинскиот претседател, Володимир Зеленски, ја обвини Русија дека стои зад нападот, во изјавата на МКЦК не се зборува конкретно кој е одговорен за гранатирањето.
– Најостро ги осудувам нападите врз персоналот на Црвениот крст. Несовесно е гранатирањето да погоди локација за дистрибуција на помош. Нашите срца се скршени денеска додека жалиме за загубата на нашите колеги и се грижиме за повредените. Оваа трагедија ослободува бран на тага, премногу познат на оние кои ги загубија своите најблиски во вооружен конфликт – рече претседателката на МКЦК, Мирјана Шпољариќ.
Од МКЦК соопштија дека нивниот тим се подготвува да им дистрибуира брикети од дрво и од јаглен во селото Виролиубивка, северно од градот Доњецк, на ранливите домаќинства, за да им помогне да се подготват за претстојната зима кога возилата што ги користеа беа погодени.
Во својата изјава, МКЦК вели:
„Тимовите на МКЦК редовно се присутни во регионот на Доњецк, а нашите возила се јасно означени со амблемот на Црвениот крст. Смртта на тројца колеги од МКЦК доаѓа во време на нагло зголемување на бројот на убиени хуманитарци ширум светот во последните 2 години“, соопшти МКЦК.
МКЦК итно повикува на почитување на меѓународното хуманитарно право, вклучително и преземање на сите можни мерки на претпазливост за да се осигури дека оние кои се вклучени во хуманитарни активности нема да бидат мети или фатени во непријателства.
