Европското фудбалско превенство што од денеска до 14 јули ќе се одржи во Германија, стартува со сериозен проблем, во неволја се најде селекцијата на Франција која е еден од главните фаворити за титулата.
Според француските медиуми, „триколорите“ се во проблеми поради вирусот кој со голема брзина се прошири низ тимот и ја заразил целата репрезентација.
Меѓу болните е и селекторот на Франција, Дидије Дешан, а одредени фудбалери имаат и посериозни проблеми.
Повеќето играчи имаат инфекции на горните дишни патишта, додека некои се борат со грчеви и главоболки. Најлошо помина Кингсли Коман.
Во однос на непредвидената ситуација во француската репрезентација се огласи Усман Дембеле, играчот на ПСЖ. Тој соопшти дека ситуацијата во тимот сега е подобра и рече дека постои можност токму тој да го донесол вирусот во тимот.
– Ми се чини дека ситуацијата е подобрена и дека сме во многу подобра состојба. Во вторникот имав висока температура. Можеби сѐ почна од мене. Сега е подобро, целата екипа е подобра, освен Коман, кој е во малку потешка ситуација – изјави Дембеле.
17.Европско фудбалско првенство почнува вечерва (21 часот) со дуелот меѓу Германија и Шкотска во Минхен во групата А. Селекцијата на Франција првиот натпревар ќе го одигра во понеделник во Дизелдорф против Австрија.
