Ракометарите на Вардар се победници во Супер Купот на Македонија. Првиот пехар сезонава вардарци го кренаа по победата над новиот шампион Еурофарм Пелистер со 30-26 во натпреварот што се одигра во Струмица.
Со оваа победа, Вардар ја прекинува серијата од два порази од битолскиот тим во претходните две години во Супер Купот во кој за титулата играат шампионот и победникот во Купот на Македонија.
„Црвено-црните“ минатата сезона ја загубија шампионската титула и прв пат завршија на 3.место во македонскиот шампионат. Летово се рестартираа и со значително подмладен состав тргнуваат во нов предизвик во новата сезона.
Вардарци во подготвителниот период го освоија престижниот пехар на Меѓународниот турнир во Струга, а победничките амбиции ги потврдија и со настапот во Супер Купот во кој доминираа против Еурофарм Пелистер. За Вардар овој триумф ќе биде дополнителен стимул пред официјалниот старт на новата сезона, а за Еурофарм Пелистер сериозно предупредување пред дебито во Лигата на шампионите.
Натпреварот во Супер Купот ќе остане забележан и како тренерско деби и прв тренерски пехар за легендата на Вардар, Стојанче Стоилов кој од оваа сезона почнува тренерска кариера. Стоилов официјално стартува како помошник тренер, но поради казната на Владо Недановски,во Супер Купот тој го предводеше Вардар од клупата.
Дуелот на големите ривали во поголем дел беше изедначен, ниту еден од противниците немаше поголема предност од два погодоци, а првиот дел заврши нерешено 13-13.
Вардар ја презеде иницијативата во завршните десет минути и на крај заслужено славеше победа и го освои пехарот.
Најефикасен во составот на Вардар беше Срдановиќ со 8 погодоци од кои шест беа од линијата од седум метри, Петриќ постигна 7, а Николиќ 5 погодоци. Кај Еурофарм Пелистер, нападот го предводеа Радивојевиќ со 7 и Кисум со 6 погодоци.
фото: РК Вардар
