Поранешниот американски претседател Доналд Трамп планира да одржи говор во Детроит на 27 септември пред членови на синдикатите, што значи дека ќе ја прескокне и втората претседателска дебата на Републиканците. Ова го соопшти еден од соработниците на Трамп и додаде дека Трамп ќе се обрати пред синдикатот на работниците во автомобилската индустрија.
Говорот доаѓа откако Трамп остро ја критикуваше политиката на претседателот Џо Бајден за електричните возила и ги повика вработените во автомобилската индустрија да ја поддржат неговата кандидатура.
Ова ќе биде вторпат Трамп да ја одбегне претседателската дебата на републиканците, иако според рејтингот, и покрај безброј правни проблеми, Трамп води пред другите противкандидати со речиси 50 процентни поени, покажуваат најновите анкети.
Говорот на Трамп и игнорирањето на републиканската дебата сигнализираат дека неговиот тим ја смета партиската номинација за завршена работа и веќе се подготвува за реванш со Бајден на општите избори следниот ноември.
