Торнадо силно оштети голема фармацевтска фабрика на „Фајзер“ во Северна Каролина во САД во средата, расфрлајќи лекови и други остатоци околу комплексот, потврдија од компанијата за американските медиуми. Нема сериозно повредени, пишува Еј-Би-Си-11.
„Ја проценуваме ситуацијата за да го утврдиме влијанието врз производството. Нашите мисли се со нашите колеги, нашите пациенти и заедницата додека се обновуваме од овој временски инцидент“, велат од „Фајзер“.
Еден од вработените, кој разговарал со ABC11, рече дека сè се случило во период од 60 до 90 секунди и дека немало време за размислување. Тој рече дека прво трепкале светлата во објектот, а потоа слушнал звук „како да пукна бомба“.
Работникот рекол дека тој и неговата група веднаш истрчале на безбедно. Бил премногу потресен да зборува пред камера, а се надева дека сите колеги се безбедни.
