Огромни количини бактерии би можеле да завршат во светските мориња поради топењето на глечерите, предупредуваат научниците. Меѓу нив би можеле да се најдат потенцијално опасни патогени, пишува Би-Би-Си.Глечерите се големи маси на мраз формирани во текот на стотици или илјадници години, а поради климатските промени тие сега се топат со алармантна брзина.
Поради нивното топење порасна и нивото на морето.
Истражувачите од Универзитетот Абериствит ја проучувале водата од глечерите низ Европа, Северна Америка и од две места во Гренланд.
100.000 тони микроби би можеле да завршат во водата
Тие велат дека нивната студија уште еднаш покажала дека мора да се справиме со климатските промени што е можно поскоро. Истражувачкиот тим проценува дека во текот на следните 80 години, повеќе од 100.000 тони микроби би можеле да бидат ослободени во водата. Тој број може да се спореди со бројот на сите човечки клетки на Земјата.
Микробиологот д-р Арвин Едвардс изјави дека ова истражување за прв пат покажало колку микроорганизми всушност се „заробени“ во глечерите. „Бројот на ослободени микроорганизми ќе зависи од тоа колку брзо ќе се стопат, односно колку брзо ќе се загрее планетата“, додаде тој.
Пресметките на тимот се засноваат на „умерено“ сценарио за затоплување, развиено од меѓународниот панел на експерти за климата IPCC. Тие проценуваат дека температурата на Земјата во просек ќе се зголеми за два до три Целзиусови степени до 2100 година.
Водата од глечерот може да влијае на квалитетот на водата
Со зголемување на протокот на вода од глечерите во светските реки, езера и мориња, квалитетот на водата може значително да се влоши, објаснува Едвардс. И по неколку десетици години, глечерите целосно ќе се стопат. „Во светот има околу 200.000 сливови кои се хранат од глечерска вода. Некои од нив се многу чувствителни средини слабо развиени во однос на хранливи материи“, тврди тој.
„Другите се извор на приход за милијарди луѓе чиј опстанок зависи од водата што доаѓа од овие глечери. Глечерите ги сметаме за огромни резерви на вода, но треба да бидеме свесни дека тие се и посебни екосистеми“, додаде тој.
Тој вели и дека во глечерите има илјадници микроорганизми, од кои некои би можеле да бидат опасни за луѓето.
„Ризикот од ова е многу мал, но сепак треба детално да се истражи“, заклучува Едвардс, а пренесува Индекс.
Истражувачот на глечерите, д-р Тристрам Ирвин-Фин, вели слично: „Во текот на следните неколку децении глечерите ќе се стопат, ние мора да работиме на нашето знаење за состојбата и судбината на овие екосистеми“. Кога ќе го разбереме ова подобро, ќе можеме подобро да го предвидиме влијанието на климатските промени врз глечерите и микроорганизмите што нивното топење ќе ги ослободи во животната средина“, вели тој.
Наодите од ова истражување беа објавени во списанието „Nature Communications Earth & Environment“.
