Иранскиот Врховен совет за национална безбедност денеска одлучи дека ќе одговори на израелскиот напад врз иранскиот конзулат во сириската престолнина Дамаск, во кој загинаа еден генерал и уште шест воени лица.
Со советот претседаваше иранскиот претседател Ебрахим Раиси, јави државната телевизија и наведе дека Израел, бидејќи не успеа да ја уништи волјата на отпорот, „на агендата го врати убивањето за да се спаси себеси“, пренесува Ројтерс.
– Израел мора да знае дека никогаш нема да ги постигне своите цели и дека ова кукавичко злосторство нема да остане без одговор – предупреди Раиси.
Не е објаснето дали одговорот ќе биде извршен директно од Иран или тоа ќе бидат милитантните групи што ги поддржува, како Хезболах и Хутите, пишува Асошиејтед прес.
Израел претходно во своите напади ги таргетираше иранските официјални лица поради поддршката на групите кои се борат во Газа, но нападот врз конзулатот претставува ескалација.
