Талибанците на власт во Авганистан убиле еден од водачите на екстремистичката вооружена група Исламска држава, за кој се верува дека е одговорен за бомбардирањето на аеродромот во Кабул во 2021 година, соопштија американските власти.
Во разорното бомбардирање на аеродромот во август 2021 година, загинаа 170 цивили и 13 американски војници кои се обидуваа да ја напуштат земјата кога талибанците ја презедоа контролата, пишува Би-би-си.
Американските власти објавија дека водачот на вооружената група бил убиен пред неколку недели, но неговата смрт дури сега е потврдена, без да се открие неговиот идентитет.
Во соопштението се наведува дека врз основа на собраните разузнавачки информации и следењето на настаните во регионот, констатирано е дека лидерот е мртов, но нема детали за тоа како се знае дека е одговорен за бомбардирањето.
Според извештајот на Њујорк Тајмс, САД дознале за смртта на лидерот на почетокот на април, но останува нејасно дали тој бил убиен од талибанците.
Повлекувањето на американските трупи од Авганистан во август 2021 година го означи крајот на најдолгата војна во Америка. Ова доведе до колапс на авганистанската влада и војска, кои беа поддржани од американската влада две децении, и враќање на талибанците на власт.
