Генералното собрание на Обединетите нации го прогласи 21 ноември за Светски ден на телевизијата, со резолуција усвоена во 1996 година, за да се истакне улогата и влијанието што телевизијата го има врз граѓаните во информирањето за социо-економските, здравствените и други проблеми во светот.
Зборот телевизија доаѓа од грчкиот збор „tele“ за далеку и од латинскиот „visio“ што значи гледање. Многу научни умови беа вклучени во развојот на тоа откритие, кое на многумина им е неопходно денес; од Пол Нипков кој го измислил првиот механички телевизиски модул кој испраќал слики преку жици, до Алан Кембел-Свинтон и Борис Розинг кои создале телевизиски систем користејќи ја катодната цевка.
Тоа беше почеток на механичката и електронската телевизија. Чарлс Џенкинс е одговорен за првиот практичен систем на механичка телевизија, додека Владимир Зворикин и Фило Фарнсворт се најодговорни за електронскиот систем, кој ја одржа својата прва демонстрација на електронскиот систем во Филаделфија во 1934 година во Институтот Френклин.
Две години подоцна, во Лондон започнаа првите нередовни преноси, а со цел преносот на Олимписките игри во Берлин и Хамбург да биде достапен за сите што немаа сопствен телевизор, беа отворени речиси 30 простории за јавна гледаност.
