Судот на Сицилија осуди 91 лице обвинети за учество во организирана криминална мрежа која ја оштети Европската Унија за околу пет милиони евра наменети за субвенции за пасишта на тој италијански, медитерански остров.
Судењето, кое заврши денеска со казни од две до 30 години и 10 ослободителни пресуди, започна во март 2021 година, а расправата траеше една недела.
Обвинителите тврдеа дека десетици членови на мафијата и работници во администрацијата се здружиле за да ги злоупотребуваат субвенциите дадени од ЕУ за користење на пасиштата, вклучително и територијата на Националниот парк Неброди на источниот крај на Сицилија.
Во извештаите за судењето, италијанските медиуми наведуваат дека 150 компании со измама прибавиле околу 5 милиони евра од 2010 до 2017 година.
Поранешниот директор на Националниот парк Ѓузепе Анточи, кој им помогна на истражителите да ја откријат измамата, денеска во судница ги слушна пресудите. Во 2016 година бил застрелан додека бил во својот автомобил, а истражителите се сомневаат дека бил нападнат од членови на сицилијанската мафија Коза Ностра.
Меѓу злосторствата беше изнуда и измама на Европската унија, а обвинителите тврдеа дека во некои случаи обвинетите користеле насилство и закани за да добијат контрола над пасиштата за да можат да аплицираат за субвенции.
Обвинителите рекоа дека разработената шема за измама вклучувала лажни сопственици да добијат средства од ЕУ. Доделените средства потоа се движеа низ сложен систем на финансиски инструменти, вклучително и сметки во странство, пред да стигнат до рацете на обвинетите.
Обвинителите тврдеа дека нотарите и бирократите вклучени во документацијата им помогнале на шефовите на Коза ностра да го спроведат планот.
