Вкупно 515 лица се повредени во несреќата во метрото во Пекинг, која, според властите, била предизвикана од нагло сопирање и лизгање на шините поради снег.
Прелиминарната истрага покажа дека ненадејно сопирање и судир поради снег ја предизвикале несреќата во метрото во Пекинг во четвртокот, соопшти Пекингската општинска комисија за транспорт, а пренесува China Daily.
Лизгавите пруги предизвикаа проблем со сигналот, поради што возот што одеше прво нагло закочи, а возот зад него не закочи навреме, соопшти Комисијата.
По несреќата во болница се пренесени вкупно 515 лица, а 102 се здобиле со скршеници. Во петокот во 6 часот од болницата се отпуштени 423 лица, 25 лица се на опсервација, а 67 лица се задржани на лекување. Во несреќата нема жртви.
Линијата на метрото Чангпинг во Пекинг денеска ќе работи нормално, освен во деловите погодени од инцидентот во четвртокот вечерта во кој се откачија два вагони, соопшти операторот.
Со цел да се обезбеди безбедно функционирање на возовите кои работат над земја или на издигнати шини за време на екстремни временски услови, возовите нема да сообраќаат автоматски, туку ќе се управуваат рачно и ќе се движат со помала брзина. Автобуските линии ќе бидат зголемени долж линиите на метрото, се вели во соопштението за печатот од метрото во Пекинг.
Пекинг од средата го зафати обилен снег со ниски температури, а студен бран ја зафати северна Кина. Инцидентот во метрото се случил во вечерниот шпиц во еден снежен ден.
