Членот на политичкото биро на движењето Хамас, Басем Наим, денеска изјави дека смртта на лидерот не значи крај на движењето.
Тој рече дека организацијата не може да биде уништена со убивање на нејзините водачи, пренесува Би-Би-Си, додавајќи дека тој не ја потврдил смртта на лидерот на Хамас, Јахја Синвар.
– Изгледа дека Израел верува оти убиството на нашите водачи значи крај на нашето движење и борбата на палестинскиот народ. Не е првпат Израел да каже нешто такво – рече Наим, алудирајќи на убиствата на претходните лидери на Хамас.
Тој додаде дека претходните лидери на Хамас, убиени од Израел, станале „икони“ за идните генерации и дека Хамас верува оти судбината на организацијата е „или победа или мачеништво“.
– Да, многу е болно и вознемирувачко да се губат најблиските, особено извонредните лидери како нашиот, но сигурни сме дека на крајот сме победници, ова е исходот за сите луѓе кои се бореле за својата слобода – рече Наим.
Водачот на милитантната група Хамас, Јахја Синвар, беше убиен во израелска операција во четвртокот.
