Најмалку 13 лица загинаа, а околу 50 се повредени откако во неделата се судрија два патнички воза во јужната индиска држава Андра Прадеш.
Покрената е спасувачка операција, а стотици работници за итна помош се на терен за да ги расчистат остатоците, пишува Би-Би-Си.
Официјални лица рекоа дека прелиминарната истрага покажала дека „човечка грешка“ довела до несреќата.
Премиерот Нарендра Моди изрази сочувство и рече дека е во контакт со министерот за железници.
Несреќата се случила во областа Визијанагарам во неделата вечерта.
Официјални лица соопштија дека три вагони на патничкиот воз, кој сообраќал меѓу Висахапатнам и Паласа, излетале од шините околу 19 часот (1330 часот по Гринич) откако биле удрени од друг воз.
Возот застанал на шините „поради откинат кабел“ кога друг патнички воз што сообраќал меѓу Висахапатнам и Рајагаде налетал одзади, изјави претставник на железницата за Ројтерс.
Стотици амбулантни возила, лекари, медицински сестри и спасувачки персонал беа испратени на местото на настанот за да ги спасат патниците и да ги извлечат телата.
Бисвајт Саху, главен службеник за односи со јавноста на железницата на Источниот брег, рече дека „човечката грешка“ довела до судирот, предизвикан од „префрлање на сигналите“ од друг воз.
Тој додаде дека по несреќата откажани се 33 воза, а 22 пренасочени. Претставниците на железницата очекуваат пругата да биде расчистена и да продолжи со работа до понеделник навечер.
