Косовскиот премиер Албин Курти денеска изјави дека средбата во Брисел со српскиот претседател Александар Вучиќ не дала резултати поради условувањата од Србија и поддршката за предлогот на претставникот на ЕУ за дијалог, Мирослав Лајчак, прво да се формира Заедница на општини со мнозинско српско население како предуслов за реализација на други договори.
Курти на прес-конференцијата рече дека на средбата дал предлог за следните чекори во спроведувањето на Договорот од Брисел и од Охрид, бидејќи српската страна немала никаков предлог. Тој додаде дека како премиер на Косово не може да го прифати предлогот на Србија да започне прво со формирање на Заедницата, како предуслов за спроведување на другите договори.
-Од 39 договори не може да се избере само еден и да се стави колата пред коњот – рече Курти.
Тој неколкупати повтори дека претседателот на Србија, Александар Вучиќ не дал никаков предлог на средбата и затоа средбата завршила без резултати, додавајќи дека компромис не може да има, бидејќи според него, не може да има компромис меѓу предлогот и редоследот на чекорите во спроведувањето на бриселскиот и охридскиот договор и стариот услов – ЗСО.
Тој рече дека во оваа прилика ја повторува подготвеноста без никакви предуслови да ги применува договорите од Брисел и Охрид.
Претходно високиот претставник на ЕУ за надворешна и безбедносна политика, Жозеп Борел, го обвини косовскиот премиер Албин Курти дека не е подготвен да прифати компромисен предлог како да се пристапи кон спроведувањето на договорот за нормализација на односите со Србија.
По новата рунда дијалог за нормализација на односите на највисоко политичко ниво, Борел рече дека на српскиот претседател Александар Вучиќ и на косовскиот премиер Албин Курти им доставил компромисен предлог за имплементација на договорот на патот кон нормализација на односите и анексот за негово спроведување од февруари и март годинава.
Борел рече дека косовската страна сака прво да започне со политичките аспекти на нормализацијата, што значи официјализирање на де факто признавањето како прв чекор. Од друга страна, Србија инсистираше прво да се започне со формирање на заедница на општини со српско мнозинство, што е обврска што двете партии ја потпишаа во 2013 година.
-Затоа го предложивме она што денес го гледаме како единствен компромис, да започне процедура во која тие два процеса би се одвивале паралелно. За жал, премиерот Курти не беше подготвен да продолжи напред и да започне кредибилен процес на формирање Заедница на општини со српско мнозинство, а претседателот Вучиќ го прифати предлогот на ЕУ за спроведување на договорот за нормализација на односите – рече Борел.
Шефот на европската дипломатија рече дека компромисниот предлог на ЕУ е поддржан од пошироката меѓународна заедница, вклучително и САД.
