Српскиот премиер, Милош Вучевиќ, синоќа изјави дека должност и одговорност на Владата ѝ е да не дозволи атмосферата на анархија да се прошири од социјалните мрежи на улиците, а очекува уште оставки поради трагедијата во Нови Сад, пренесе Бета.
На состанокот на Главниот одбор на владејачката Српска напредна партија (СНС), Вучевиќ додаде дека обврска и одговорност е да не се дозволи некој да ја пали, уништува и да ја урива државата, како и општеството, бидејќи е бесен и гневен.
– Многу граѓани се разочарани и исплашени. Некои дури се и гневни. Но, тоа не значи дека треба да си ја урнеме куќата, да ја запалиме. Дотолку повеќе што одговорноста на СНС е најголема затоа што доби најголема поддршка од граѓаните – нагласи Вучевиќ.
Вучевиќ, кој е и претседател на СНС, по седницата изјави дека во наредните денови очекува уште оставки.
Тој додаде дека во Претседателството на партијата се разговарало за конкретни имиња кои треба да сносат политичка одговорност, јави ТВ Н1.
– Кога велиме дека очекуваме од нашите членови политички да се борат, тоа не значи дека некој некого аболира или амнестира од кривично-правна одговорност или од политичка одговорност – рече Вучевиќ.
Запрашан дали на состанокот на раководството на СНС се разговарало и за конкретни имиња кога станува збор за оставки, на кои тој и Вучиќ претходно инсистираа, тој одговори потврдно.
– Што се однесува до одговорноста, во Претседателството разговаравме конкретно и со имиња. Очекувам дека во наредните денови уште некои луѓе ќе сносат политичка одговорност за тоа што се случи. Станува збор за луѓе кои се членови на Претседателството и на извршната власт, очекувам уште оставки – нагласи тој, пренесе Бета.
