Србија нема да може да испорачува руска нафта преку Јадранскиот нафтовод (Јанаф) поради новиот пакет санкции на Европската унија против Русија, кои се однесуваат на увоз на нафта по морски пат, потврди српското Министерство за рударство и енергетика за N1 Белград. Нафтата од Русија покрива 16 отсто од енергетските потреби на Србија.
„Новиот пакет санкции забранува снабдување со руска сурова нафта преку кое било пристаниште или. поморските патишта, а Нафтената индустрија на Србија (НИС) испорачува сурова нафта, која се доставува со танкери до пристаништето Омишаљ во Хрватска. Тоа значи дека нема можност да продолжи да испорачува руска нафта до рафинеријата во Панчево, но НИС може да увезува нафта што не доаѓа од Русија, како што во минатото увезуваше нафта од Ирак и некои други земји“, велат тие. .
Србија, исто така, размислува за снабдување со руска нафта преку алтернативни патишта. Суровата нафта што се испорачува преку цевководи е предмет на привремено изземање од санкциите на ЕУ. Така, земјите-членки кои се зависни од руската нафта поради нивната географска локација можат да продолжат да ја снабдуваат оваа нафта преку цевководи. Тоа се Чешка, Словачка, Бугарија и Унгарија, кои добиваат нафта преку нафтоводот Дружба.
Според експертите за енергетика, Јанаф би можел да земе одредена количина нафта од системот Дружба и да ја транспортира до рафинериите во Хрватска, Босна и Херцеговина и Србија. Експертите нагласуваат дека за тоа ќе одлучи европската политика.
Минатиот викенд Србија потпиша договор и со Унгарија за складирање на природен гас за следната зима. До крајот на месецов ќе насочи 500 милиони кубни метри гас во унгарските складишта, а можно е да купува и гас од Унгарија.
