Повеќе од половина Македонија е потпишана на оваа интерпелација, вели пратеникот од ВМРО-ДПМНЕ Миле Лефков на денешната седница на која се дискутира за интерпелацијата на собранискиот спикер Талат Џафери.
Лефков порача дека непринципиелното и противуставното однесување на Џафери е резултат на заштита на криминалот на владата.
– Наместо да разговараме за тоа каде не донесе оваа влада да е неподносливо живеењето во државата Талат Џафери лично со своето непринципиелно, противуставно, противзаконско работење се поставува како жив штит и собранието го фрла како топовско место, како жртва во заштита на владата која има само и само криминални побуди – изјави тој.
Лефков додаде дека покрај пораз на економски и национален план, државата се соочува и со праз на демократијата внатре во собранието, како и дека Џафери наместо да ги штити процедурите и со тоа демократијата, тој ги крши.
– Како претседател на собранието вие треба да ја претставувате законодавната власт, треба да бидете чувар на процедурите. Преку чување на процедурите се зачувува и се задржува демократијата – вели Лефков.
Тој ги повика пратениците од владејачкото мнозинство да престанат да бидат само апарат за гласање, и ги побара од нив да ја поддржат оваа интерпелација се со цел конечно да започнат да работат во интерес на граѓаните.
