Шпанскиот текстилен гигант Индитекс, кој меѓу другото управува со Зара, минатата година имаше рекордна нето добивка.
Шпанскиот текстилен гигант Inditex, кој, меѓу другото, го поседува и синџирот продавници за модна облека Зара, минатата година забележа нето добивка од рекордни 4,1 милијарди евра, што е за 27 отсто повеќе од 2021 година, пренесува француската новинска агенција АФП.
Рекордни се и приходите кои се зголемени за 17 отсто на 32,6 милијарди евра.
Inditex успеа да постигне добри деловни резултати и покрај прекинот на работењето во Русија и високата инфлација. Компанијата ги затвори своите 512 продавници во Русија, која е втор најголем пазар на Inditex по Шпанија, по избувнувањето на војната во Украина, според АФП. Продавниците беа продадени во октомври на Daher Group од Обединетите Арапски Емирати.
„Одличните резултати во 2022 година ја демонстрираат силата на нашиот бизнис модел“, рече главниот извршен директор на Inditex, Оскар Гарсија Макеирас.
Шпанската групација го промени менаџментот минатата година, Марта Ортега, ќерка на основачот и мултимилијардер на Индитекс Амансио Ортега, ја презеде функцијата претседател.
Компанијата очекува дополнителен раст оваа година, бидејќи продажбата меѓу 1 февруари и 13 март веќе е зголемена за 13,5 отсто во споредба со истиот период минатата година, пренесува AFP.
