Сопругата на Џулијан Асанж вели дека основачот на Викиликс нема да ја преживее екстрадицијата од Велика Британија во САД. Неговата последна жалба ќе биде разгледана во Високиот суд во вторник, а Стела Асанж вели дека нејзиниот сопруг е исклучително слаб физички и психички.
Во интервју за BBC Radio 4 во емисијата Today, таа рече дека „ова многу добро би можело да биде последното рочиште за Џулијан“.
Асанж се бара во САД под обвинение за шпионажа и се соочува со затворска казна до 175 години.
Случајот се однесува на периодот од 2010 и 2011 година кога објавил илјадници доверливи документи, за кои американските власти тврдат дека претставува кршење на законот и загрозување животи.
Стела Асанж тврди дека постапката против него е политички мотивирана.
Таа изјави за Би-Би-Си дека ако нејзиниот сопруг го загуби случајот пред Високиот суд во Лондон во вторник, „нема можност за понатамошна жалба во оваа јурисдикција“.
Сепак, таа ја покрена можноста за поднесување барање до Европскиот суд за човекови права за да се обиде да обезбеди итна судска забрана.
Таа посочи дека врз основа на слични случаи на екстрадиција, ќе биде само „прашање на 24 часа“ за да се преземе таков правен чекор.
Таа за Би-Би-Си изјави дека стресот предизвикан од случајот го оставил нејзиниот сопруг физички и психички „во многу тешка ситуација“ знаејќи дека „се може да се случи оваа недела“.
„Овој случај ќе одлучи дали тој живее или умре, во основа“, додаде таа.
Асанж, австралиски државјанин, е задржан во лондонскиот затвор Белмарш од 2019 година во очекување на постапката за екстрадиција во САД.
Во 2021 година, Високиот суд пресуди дека Асанж треба да биде екстрадиран и ги отфрли тврдењата дека неговото лошо ментално здравје значело дека е во опасност да си го одземе животот во американски затвор.
Врховниот суд ја потврди таа одлука една година подоцна, а потоа и министерката за внатрешни работи Прити Пател ја потврди наредбата за екстрадиција.
Австралискиот парламент минатата недела го поддржа предлогот со кој се повикуваат САД и Велика Британија да го ослободат Асанж пред клучното сослушување оваа недела.
