Пациент со симптоми слични на оние на смртоносниот вирус Марбург е примен во универзитетска болница во Валенсија, Шпанија, објавија шпанските медиуми. Станува збор за маж (34) кој неодамна бил во Екваторијална Гвинеја, каде што избила инфекција со овој вирус.
Биолошките примероци на пациентот беа испратени во референтната лабораторија на здравствениот институт Карлос III во Мадрид за потврда на случајот.
Мажот бил префрлен од приватна болница и примен во Одделот за изолација на високо ниво на Универзитетот во Ла Фе де Валенсија и Политехничката болница, што гарантира безбедност и на неговата нега и на заштитата на здравствените работници кои го лекуваат.
Во средината на февруари Светската здравствена организација потврди дека во Екваторијална Гвинеја избила инфекција со вирусот Марбург.
Станува збор за вирус кој предизвикува болест од која умираат околу 50 отсто од заразените. Симптомите се треска, исцрпеност, како и траги од крв при повраќање и дијареа.
Вирусот е редок кај луѓето, но станува многу заразен кога ќе зарази човечки домаќин.
