Вака гласи предложениот нов став 5 кон членот 22 во Законот за измени и дополнување на Законот за бугарско државјанство, што го предлага бугарското Министерство за надворешни работи. Сите предложени измени се објавени на сајтот на МНР и на порталот за општествена консултација, можност која ќе трае до први декември, пишува Дојче Веле.
„Целта на законскиот проект е да се создаде можност за откажување на натурализацијата во случај на намерни антибугарски манифестации од страна на лице кое се стекнало со бугарско државјанство”, се вели во Извештајот што го испратила до Владата вицепремиерката и министерка за надворешни работи, Марија Габриел.
Стекнувањето државјанство со натурализација бара и обврски за почитување на бугарските закони, почит кон Бугарија и нејзините национални симболи и институции. „Секоја форма или манифестација на омраза, нетрпеливост и агресија кон бугарската држава, нејзините граѓани и/или бугарските заедници во странство, не само што е недозволива, туку подразбира и отсуство на чувство за припадност кон бугарската држава“, наведува Габриел во Извештајот до Владата.
Покрај ова, за оние кои во иднина ќе добијат бугарско државјанство, се предлага уверенијата да им бидат доделувани на посебна церемонија. За таа цел се предлага во постојниот член 37 да се додаде став 3 со следната содржина: „Лицата кои се стекнале со бугарско државјанство ги добиваат потврдите во Министерството за правда или во дипломатските и конзуларните претставништва на Република Бугарија во странство, на церемонија што се одвива по ред определен од министерот за правда, односно од министерот за надворешни работи“.
Според податоците на бугарското Министерство за правда од 2001 до 2022 година врз основа на бугарско потекло бугарско државјанство побарале 129.382 Македонци, а 99.340 од нив веќе го добиле.
ЌЕ СЕ ФОРМИРА СОВЕТ ЗА КООРДИНАЦИЈА НА ПОЛИТИКИ ЗА БУГАРИТЕ НАДВОР ОД РЕПУБЛИКА БУГАРИЈА
Бугарското МНР предложило и Закон за измена и дополнување на Законот за Бугарите кои живеат надвор од Република Бугарија. Според образложението на Марија Габриел, измените се предлагаат за да ги пополнат законските празнини токму преку конституирање на нов државен орган – Совет за координација на политики за Бугарите надвор од Република Бугарија, кој ќе функционира паралелно со законски предвидениот Национален совет за Бугарите кои живеат надвор од Република Бугарија
Каква е разликата меѓу двете тела? Во првото тело членуваат претставници на бугарски заедници во странство, а во новопредложеното треба да седнат лично претставници на бугарската влада.
Конституирањето на Советот за координација се смета за предуслов за решавање на прашања од координативен карактер, поврзани со зачувувањето и ширењето на бугарскиот јазик и култура меѓу бугарските заедници во странство и зачувување на бугарското културно и историско наследство. Според предлогот, Советот ќе издава насоки и ќе препорачува активности за реинтеграција на бугарските државјани кои се враќаат во Република Бугарија; ќе ги штити правата и интересите на Бугарите во странство; ќе ги синхронизира активностите на програмите и проектите насочени кон бугарските заедници и нивните организации надвор од државата; ќе формулира цели задачи насочени кон политиките поврзани со бугарските заедници и нивните организации надвор од земјата.
