Собранието попладнево го донесе Законот за енергетика кој се смета за еден од поважните закони, со кој се врши усогласување на македонското законодавство со европската регулатива во областа на енергетиката. За Законот гласаа 62 пратеника.
Една од најзначајните придобивки е создавање на либерален, транспарентен и конкурентен пазар за електрична енергија. Ова, според надлежните, ќе го зголеми изборот и квалитетот на услугите за потрошувачите, а цените на енергија ќе бидат пофер и пониски поради конкуренцијата. Законот е изработен од страна на Министерството за енергетика, без странски консултанти.
Министерката за енергетика Сања Божиновска неодамна во разговор за МИА оцени дека се работи за еден од најважните закони, бидејќи според нашите обврски кон енергетската заедница требал да биде донесен уште во 2023 година.
– Многу е важен, бидејќи сите европски регулативи се воведуваат, се имплементираат кај нас. Таму првпат се регулираат батериите, односно складирањето на електрична енергија, се формираат граѓански заедници. Првпат почнува да се прави методологија за мерење енергетска сиромаштија. Со овој закон МЕПСО ќе помине под Министерството за енергетика, што е нормално и очекувано. Исто така има и за нафта, за гас. Има многу работи, станува збор за многу обемен закон со 317 членови – истакна Божиновска.
Според претседателот на Регулаторната комисија за енергетика Марко Бислимоски, со ова законско решение стануваме како да сме земја членка на Европската Унија, бидејќи се имплементирани сите европски директиви во областа на енергетиката.
Најголем предизвик во следниот период ќе биде изработката и усвојувањето на подзаконските акти и регулативи.
