Српската министерка за рударство и енергетика Дубравка Чедовиќ денеска остварила средба со генералниот директор на ЈП „Србијагас” Душан Бајатовиќ, на која разговарале за планираната гасна интерконекција со Северна Македонија, како и за текот на изградбата на гасната интерконекција Србија – Бугарија.
Во соопштението на Министерството за рударство и енергетика на Србија се наведува дека на средбата се зборувало за наредните фази на проектот за гасната интерконекција меѓу Србија и Северна Македонија.
Министерката Чедовиќ изјавила дека во претходниот период се преземени важни чекори со цел изградбата на гасната интерконекција со Бугарија да се одвива според планираната динамика.
– Со оглед на тоа што интерконекцијата Србија-Бугарија е од стратешка важност за енергетската безбедност на нашата земја, бидејќи со нејзината изградба ќе го диверзифицираме снабдувањето со гас, важно е да се почитуваат дадените рамки и рокови, со цел зафатите да бидат завршени пред почетокот на следната грејна сезона – нагласи Чедовиќ.
