Докторите велат дека имунотерапискиот лек што ги „топи“ туморите драстично ги зголемува шансите за преживување и излекување на некои видови рак на дебелото црево, па дури и може да ја елиминира потребата од операција.
Пембролизумаб ја блокира активноста на молекулата PD-1, специфичен протеин на површината на имунолошките Т-клетки кој оневозможува препознавање на малигните клетки.
На овој начин, лекот ја зголемува способноста на нашиот имунолошки систем да ги напаѓа клетките на туморот.
Последното клиничко испитување покажало дека кај огромен број пациенти, на кои пред операцијата наместо хемотерапија им бил даден овој лек, им се повлекол ракот.
Научниците ги претставија резултатите од истражувањето на годишниот состанок на Американското здружение за клиничка онкологија (ASCO), најголемата светска конференција за рак.
Втората водечка причина за смрт на заболените од рак во светот
Студијата е спроведена од Универзитетскиот колеџ во Лондон (UCL), Фондацијата Кристи NHS Trust Cancer Center во Манчестер, Универзитетската болница Сент Џејмс во Лидс, Универзитетската болница Саутемптон и Универзитетот во Глазгов, пишува Гардијан.
„Примената на оваа имунотерапија пред операцијата би можела да стане голема пресвртница за пациентите со овој тип на рак.
Не само што исходот е подобар, туку пациентите не треба да поминат низ хемотерапија, која често има штетни несакани ефекти.
Во иднина поради имунотерапија, можеби нема да има потреба ни од операција“, вели Марк Сондерс од Центарот Кристи.
Ракот на дебелото црево е втора водечка причина за смрт од рак во светот.
Светската здравствена организација (СЗО) наведува дека годишно се регистрираат повеќе од 1,9 милиони нови случаи и повеќе од 900.000 смртни случаи.
Нема потреба од хемотерапија
Научниците спровеле студија на 32 пациенти од пет болници во Велика Британија кои имале рак на дебелото црево од 2 или 3 стадиум и со одреден генетски профил (дефициентни MMR/MSI-H).
Околу 15% од пациентите со втор или трет стадиум на рак на дебелото црево ја имаат оваа генетска структура.
Пред операцијата, пациентите примале пембролизумаб, исто така познат како Китруда, девет недели наместо вообичаениот третман со хемотерапија.
Дури 59% од пациентите по третманот со пембролизумаб немале знаци на рак, додека кај останатите 41%, остатоците од малигните формации биле отстранети со операција.
Сите пациенти кои биле дел од испитувањето, по лекувањето биле без рак.
Во случај на стандардна хемотерапија пред операција, ракот е целосно отстранет само кај помалку од 5% од пациентите со овој генетски профил.
Во текот на следните неколку години, научниците имаат намера да ја истражат вкупната стапка на преживување и стапката на рецидив по употребата на оваа терапија.
„Имунотерапијата може да ги уништи туморите пред операција“
„Нашите резултати покажуваат дека пембролизумаб е безбеден и високо ефикасен третман за подобрување на резултатите кај пациенти со високоризичен рак на дебелото црево, зголемувајќи ги шансите за излекување на болеста во рана фаза“, рекол онкологот Каи-Кин Шиу од UCLH.
„Имунотерапијата може да ги уништи туморите пред операцијата.
Ако го „стопите“ ракот пред операцијата, обично тројно ја зголемувате шансата за преживување.
На пациентите исто така не им е потребна хемотерапија“, додал Шиу.
