Смртта на лидерот на Хезболах е Хасан Насрала е значаен удар за организацијата и за нејзиниот клучен спонзор Иран. Милитантната организација и политичка партија која контролира голем дел од јужен Либан денеска потврди дека Насрала бил убиен во израелски воздушен напад врз главниот град Бејрут на 27 септември.
Насрала беше 30 години на чело на Хезболах и за тоа време ја трансформираше шиитската милиција во главна политичка сила во Либан и силен противник на соседниот Израел. Тој го претвори Хезболах во моќен политички и воен ентитет и главен регионален играч.
Хезболах е водечки член на иранската таканаречена Оска на отпорот, лабава мрежа на ирански претставници и милитантни групи поддржани од Техеран против Израел и САД. САД ја сметаат Хезболах за терористичка организација, а Европската унија го стави на црната листа нејзиното вооружено крило.
Смрт со сериозни импликации во регионот
По смртта на Насрала уследија многу реакции.
„Тоа е голема загуба и срам за Иран“, рече Али Фатолах-Неџад, директор на Центарот за Блискиот Исток и глобален поредок со седиште во Берлин.
Според Фатолах-Неџад, „ова е најтешкиот удар за регионалната позиција на Техеран од атентатот на главниот ирански командант Касем Сулејмани во американскиот воздушен напад во Ирак во 2020 година. Насрала, Сулејмани и иранскиот врховен водач, ајатолахот Али Хамнеи, се сржта на амбициите на Иран за проширување во регионот“, рече тој.
Смртта на 64-годишникот ќе има „сериозни импликации“ за операциите на иранската оска на отпор, изјави Хамидреза Азизи, соработник на германскиот институт за меѓународни и безбедносни прашања.
„На краток рок, ова ќе резултира со сериозни празнини, недоволна координација и нејаснотии“, додаде тој.
Според Азизи, јеменските Хути , исто така членови на оската, би можеле да ја преземат позицијата на Хезболах доколку Иран одлучи да воспостави нова хиерархија во мрежата.
„Хутите беа поефикасни во предизвикувањето на Израел од остатокот од оската и претрпеа помалку неуспеси. Но, нема гаранција дека тие ќе останат вака“, вели Азизи.
Според Норман Руле, ветеран на ЦИА, „ќе биде тешко да се замени Насрала“.
„На секој наследник ќе му недостасува неговиот политички статус во Либан и неговиот личен однос со иранскиот врховен лидер“, изјави Руле.
Хеико Вимен од Меѓународната кризна група во Брисел коментира дека „Хезболах е премногу институционализиран за да му се отсече главата“.
Хезболах претрпе големи неуспеси во последните месеци. Израел ги убил клучните членови на раководството, неутрализираше значаен дел од воениот арсенал и ја поремети комуникацијата во организацијата.
Кој беше Хасан Насрала?
Харизматичен свештеник и вешт оратор, Насрала беше избран за шеф на Хезболах на 32-годишна возраст. Со значителна финансиска и политичка поддршка од Техеран, Хезболах беше изграден во моќен политички и воен ентитет во Либан и главен играч во регионот.
Шеикот Хасан Насрала, водачот на милитантното либанско шиитско движење Хезболах, е една од најпознатите и највлијателните личности на Блискиот Исток.
Под негово водство Хезболах помагаше во обуката на борците од палестинската вооружена група Хамас, како и на милициите во Ирак и Јемен, а прими проектили и ракети од Иран за употреба против Израел.
Тој го насочи развојот на Хезболах од обична милиција основана да се бори против израелските трупи кои го окупираа Либан во воена сила посилна од либанската армија. Хезболах е една од најмоќните сили во либанската политика, главен пружател на услуги од областа на здравство, образованието и социјалните услуги, но и клучен дел од сојузниците на Иран во борбата за регионална превласт.
Тој со години не е виден во јавноста поради стравувањата дека Израел ќе го убие.
