Смртоносните поплави што погодија делови од Шпанија на крајот на октомври, ја принудија тамошната влада да воведе законско право на т.н. климатско отсуство за работниците.
На овој начин, велат од владата, се спречуваат дополнителни опасности при патувањето до работното место, но и намалување на платите доколку работниците решат да останат дома при екстремни временски услови.
Според законот кој е во сила од 29 ноември, вработените можат да добијат до 4 дена платено отсуство доколку не можат да дојдат на работа поради екстремни временски услови.
Климатското отсуство ќе се заснова на метеоролошки предупредувања од надлежните органи. Ако шпанската Aгенција за цивилна заштита каже дека луѓето треба да останат дома и не можат безбедно да стигнат на работа, тогаш вработените ќе можат да земат платено климатско отсуство.
Покрај почетните 4 дена платено отсуство, според постојните одредби за итни случаи, вработените можат да го скратат работниот ден, што обезбедува дополнителна флексибилност за време на подолготрајни кризи.
Законот ги задолжува компаниите да изготват акциски планови со мерки за превенција од ризици во случај на катастрофи и неповолни временски услови во текот на следната година.
-Климатските ризици не се исти за работник во градежната индустрија или на отворено како за работник во клиника или библиотека. Затоа, на шпанските компании им даваме мандат дека во рок од една година мора да имаат протоколи за дејствување – нагласуваат од владата.
Новите правила за вработените доаѓаат по огромната трагедија оваа есен: поплавите во Валенсија однесоа повеќе од 200 животи.
Слично отсуство од работа има и Канада.
