Градоначалникот на Љубљана, Зоран Јанковиќ е под истрага за кривични дела за економски криминал и корупција. Од утрово во тек се претреси во општина Љубљана и во куќата на градоначалникот Јанковиќ, потврдено е за Н1 од општинските служби во словенечката престолнина.
Полициската управа на Љубљана соопшти дека се спроведуваат обемни активности „како дел од истрага за „кривични дела за економски криминал и корупција“ во поширокото подрачје на Љубљана, Целје, Крањ и Нова Горица, пренесува N1 Словенија.
„Полициската управа во Љубљана спроведува обемни оперативни активности по наредба на надлежниот суд во контекст на истрагата за кривични дела економски криминал и корупција. Истрагата ја води специјализираното државно обвинителство, полицијата не може да даде повеќе информации поради интересите на истрагата“ – стои во соопштението од полицијата.
Според информациите на порталот Нецензурирано, истрагата треба да се спроведе во просториите на „Вока Снага“ и „Енергетика Љубљана“ како и во седиштето на Фудбалскиот клуб Олимпија.
Според нивните сознанија, криминалистичката полиција истражува различни сомнителни неправилности, и тоа неовластено стекнување спонзорски средства, ангажирање на еден од вработените и уште неколку случаи.
Засега, како што се наведува, не се знае кои се осомничените и кои сомнителни дела се истражуваат.
