Гитарата што ја скршил фронтменот на Нирвана Курт Кобејн продадена е за 600.000 долари, објави аукциската куќа „Џулиен“.
На гитарата стојат потписите на членовите на бендот, фронтменот Кобејн, басистот Крист Новоселиќ и тапанарот Дејв Грол. На неа сѐ уште се познаваат пукнатини, таа беше повторно составена, но на неа не може повеќе да се свири.
– Кога беше на сцената и свиреше, Курт Кобејн беше машина. Тој беше лут и тоа можеше да се почувствува. Особено по начинот на кој ракуваше со своите инструменти – изјави Коди Фредерик од аукциската куќа.
Тој додаде дека оштетената гитара го симболизира „оштетениот музичар“ и „суровото и бурно време“ во музиката.
Нирвана е основана кон крајот на 80-тите во Вашингтон. Групата се здоби со слава во 1991 година со нивниот втор албум „Nevermind“, кој беше продаден во повеќе од 30 милиони примероци.
Фронтменот на групата стана идол и глас на новата генерација, но во текот на животот се бореше со зависност и здравствени проблеми.
Тој изврши самоубиство во април 1994 година во Сиетл, на 27-годишна возраст.
