Обилните врнежи од дожд пропратени со силен ветер вчера го погодија италијанскиот регион Јужен Тирол и австрискиот дел долж границата, оставајќи траги од штета, соопштија властите.
Помали мостови беа однесени во кратко, но силно невреме, а одрон е забележан и под превојот Гардена во Доломитите во североисточна Италија.
Потоците во општината Оланг во близина на границата со Австрија се претворија во порои, а однесени се и неколку дрвени мостови.
Локалните противпожарни служби известија дека патиштата се блокирани од кал.
Видеата на социјалните мрежи покажаа дека три моста се разурнати додека потокот Фуркелбах се излеа од коритото.
Одронот на 3 километри под превојот Гардена здроби неколку паркирани автомобили. Нема извештаи за повредени.
Во долината Пустер за два часа се забележани 50 литри дожд на метар квадратен и 500 молњи, објавија метереолозите кои најавуваат нови обилни врнежи во наредните денови, во овој регион на италијанско-австриската граница.
