Составот на Комисијата за помилување не даде отказ, туку поднесе оставка од лични и професионални причини, информира шефицата на државата, Гордана Сиљановска-Давкова по напуштањето на должноста од претходните членови во Комисијата за помилување.
Претседателката вели дека води разговори за нови членови на Комисијата и истакна дека никогаш брзо не ги прави работите.
– Треба да бидат вклучени сите профили за да може на крајот на тој процес на помилување, кој почнува во судот, а завршува со потписот, да биде успешен. Разговараме со експерти, луѓе од невладин сектор. Што се однесува со средбата, таа беше неколку пати закажувана и одложувана заради други настани. Мислам дека е добро време да се слушнат мислењата на сите претходни членови на комисиите, за потоа да видиме какви се нивните искуства, сознанија и во кој правец треба да бидат промените – кажа Сиљановска-Давкова како одговор на новинарски прашања.
Според неа, за дел од контроверзните лица кои се најдоа на последната листа со помилувани, се воделе од филозофијата за заштита на човековите права.
– Верував и сѐ уште верувам дека луѓето и кога се во затвор, се луѓе. Можеби се расчовечиле во одредени моменти, но не треба да заборавиме дека тие се граѓани, гласаат и затоа постои правото на помилување. Секој треба да добие шанса за социјализација и ресоцијализација. Судот е должен кога го креира досието за осудениот и оној што бара помилување да ги наведе сите релевантни акти. Ниту јас, ниту Комисијата, ниту Правда не сме истражни органи – додаде претседателката.
