Швајцарската скијачка асоцијација соопшти дека починала Софи Хедигер, 26-годишна сноубордерка.
Несреќниот спортист бил затрупан од лавина во понеделникот во швајцарскиот зимски центар Ароса.
„Шокирани сме, нашите мисли се со нејзиното семејство на кое му изразуваме сочувство. Оваа смрт фрла трагична сенка на нашите божиќни празници, ние сме крајно тажни. Таа го загуби животот трагично, брутално и прерано“, изјави Волтер Ројзер, извршен директор на Швајцарската скијачка асоцијација.
Хедигер ги постигна своите први два подиуми на Светскиот куп минатата сезона, а најдобар резултат во кариерата и беше второто место во Сент Мориц, Швајцарија.
Во февруари 2022 година, таа учествуваше на Олимписките игри во Кина во сноуборд крос за жени и сноуборд крос во мешан тим.
Нејзиното семејство побара од Швајцарската скијачка асоцијација да им пренесат на медиумите дека немаат намера да објавуваат никакви информации за смртта на Софи, а притоа апелираат да се почитува приватноста на ужалените.
