Шпанската престолонаследничка принцезата Леонор ќе ја започне својата тригодишна воена обука во септември, објави министерката за одбрана Маргарита Роблес.
Таа додаде дека најстарата ќерка на кралот Филип Шести, која во октомври ќе наполни 18 години, ќе присуствува на Генералната воена академија на шпанската армија во североисточниот град Сарагоса во учебната 2023-2024 година.
Наследникот на шпанскиот трон потоа ќе помине една година во поморско училиште во северозападниот регион Галиција и една година на Академијата за воздухопловство во југоисточниот регион Мурсија, изјави Роблс за новинарите.
По состанокот на владата, министерката појасни дека Кралската палата смета дека Леонор „мора да помине воена обука, како нејзиниот татко, кралот Филип, како што е вообичаено во другите парламентарни монархии“.
„Во последниве години, направивме значителни напори за вклучување на жените во вооружените сили“, рече таа.
Принцезата треба да заврши двегодишно образование на UWC Atlantic College во Велс на крајот на мај.
Ако тргне по стапките на својот татко, по завршувањето на воената обука ќе оди на универзитет во Шпанија, а потоа ќе магистрира во странство.
Кралот Филип VI. студирал право на Универзитетот Комплутенсе во Мадрид, а потоа магистрирал меѓународни односи на Универзитетот Џорџтаун во Вашингтон.
Шпанската кралска палата појасни дека „во европските парламентарни монархии се почитува традицијата според која идните шефови на држави мора да имаат и воена кариера“.
Во соопштението за медиумите се потсетува и дека, според шпанскиот устав, принцезата Леонор ќе стане шеф на вооружените сили кога ќе се качи на тронот.
Шпанската монархија се бори да го поправи својот имиџ по серијата скандали што ја опфатија во текот на изминатите неколку децении, главно поврзани со поранешниот крал Хуан Карлос, кој абдицира во 2014 година во корист на неговиот син поради случајот за даночна измама во кој беа вклучени некои членови на кралското семејство.
Тука е и скандалот поврзан со неговото патување во Африка за да лови слонови во време кога Шпанија минуваше низ длабока рецесија.
Поранешниот монарх живее во Абу Даби од август 2020 година. Во меѓувреме, беа отворени неколку истраги за неговата наводна измама во Шпанија и Швајцарија, но тие подоцна беа суспендирани.
