Германскиот канцелар Олаф Шолц во разговор со израелскиот премиер Бенјамин Нетанјаху побара „хуманитарни прекини на огнот“ за заштита на цивилното население во Појасот Газа, а претходно денеска рече дека решението со две држави е клучот за ставање крај на блискоисточната криза.
„Германскиот канцелар ја нагласи неопходноста од подобрување на хуманитарната состојба на жителите на Појасот Газа. Хуманитарните прекини на огнот можат да придонесат за значително подобрување на снабдувањето на населението“ – соопштија од кабинетот на Шолц.
По тој повод, израелскиот премиер Бенјамин Нетанјаху го информираше Шолц за напорите на Израел да ги заштити цивилите во Појасот Газа, на што Хамас продолжува да се спротивставува. Двајцата државници се заложија за понатамошни напори за ослободување на заложниците кои ги држи Хамас.
Шолц уште еднаш ја изрази солидарноста на Германија со граѓаните на Израел и нагласи дека Германија „непоколебливо стои на страната на Израел“. Пред тоа, германскиот канцелар на настан во Нутетал во близина на Берлин изјави дека Германија стои на страната на Израел, но истовремено е и со САД, најголемиот донатор на хуманитарна помош за жителите на Појасот Газа.
-Не се државите од соседството, иако многу од нив се многу богати, тие што овозможуваат работа на болниците и училиштата во Појасот Газа, туку тоа сме ние – рече Шолц.
Во исто време, тој ја критикуваше изградбата на еврејски населби во палестинската област на Западниот Брег.
– Не сакаме нови населби на Западниот брег или насилство од доселениците врз Палестинците – рече германскиот канцелар.
Трајно решение за блискоисточната криза лежи во решение со две држави, заклучи Шолц.
– Ние не го поддржуваме тоа што некои израелски политичари да не прифаќаат палестинска држава – рече Шолц.
