Шести пакет санкции: Европската комисија предлага ембарго за увоз на руска нафта
Во шестиот пакет санкции против Русија, Европската комисија предлага и ембарго за увоз на нафта.
Претседателката на Европската комисија, Урсула фон дер Лајен денеска им се обрати на европратениците и им го претстави предлогот за шестиот пакет санкции против Русија. Пакетот санкции вклучува и целосно ембарго за увоз на руска нафта – сурова и рафинирана, оние кои пристигнуваат во Унијата преку цевководи и оние кои пристигнуваат со брод.
Според Фон дер Лајен, Европската комисија предлага постепено воведување на ембарго. Ембаргото за увоз на сурова нафта се очекува да биде воведено за половина година, а ембаргото за увоз на рафинирани производи до крајот на годината.
„Нема да биде лесно. Некои земји-членки се во голема мера зависни од руската нафта. Но, ние едноставно мора да работиме на тоа“, рече фон дер Лајен во своето обраќање, нагласувајќи дека постепеното воведување на ембаргото ќе изврши максимален притисок врз Русија и ќе ја минимизира колатералната штета за земјите од Европската унија и партнерите во ЕУ.
Нејзината најава за ембарго за увоз на нафта доби аплауз од Европскиот парламент.
