Таканаречената „парада на планетите“, кога ќе се израмнат Меркур, Марс, Јупитер, Сатурн, Уран и Нептун, ќе се одржи на 3 јуни.
Феноменот следи низа големи небесни настани, вклучувајќи ретко целосно затемнување на Сонцето во април и моќна сончева бура во мај, која предизвика поларна светлина ширум светот, вклучувајќи го и Балканот.
НАСА наведува дека планетарното усогласување се случува врз основа на времето потребно на секоја планета да заврши една орбита околу Сонцето. Времетраењето на секоја орбита варира од планета до планета, што ја објаснува реткоста на вакви настани – особено поголемите како овој кон крајот на мај-почетокот на јуни.
„Парадата на планетите“ ќе биде видлива во зависност од локацијата на Земјата и користената технологија. Само неколку ќе бидат видливи со голо око. Според „Пипл“, феноменот до одреден степен ќе може да се види речиси од сите делови на земјината топка, вклучувајќи ги и Абу Даби и Њујорк.
Кои планети ќе се наредат и ќе бидат видливи?
Не секое порамнување е „парада на планети“. Небесниот настан се дефинира како парада кога повеќе планети учествуваат во порамнување, како оваа сега, во која ќе учествуваат сите планети од Сончевиот систем освен две.
Меркур, Марс, Јупитер, Сатурн, Уран и Нептун ќе бидат порамнети. Месечината исто така ќе биде видлива во ова време.
Кога е парадата на планетите?
„Science Alert“ вели дека Меркур, Марс, Јупитер и Сатурн ќе бидат доволно светли за да се видат со голо око и дека најдобро време за набљудување е по зајдисонце или пред зори.
„Форбс“ сепак пишува дека само Сатурн и Марс ќе бидат видливи пред зори на 3 јуни, во правец исток-југоисток. Уран и Нептун се премногу мали за да се видат без телескоп, особено пред зори, додека Јупитер и Меркур ќе бидат изгубени во сјајот на Сонцето, пишува весникот.
„Побарајте црвеникав Марс помеѓу Сатурн и Месечината“, објави НАСА на Твитер.
Ослабената Месечина ќе свети во близина на Марс, но нема причина да станете рано на 3 јуни само поради тоа. До 4 јуни ќе може да се види Месечината со Марс и Сатурн, наведува „Форбс“.
Доколку го пропуштите ова, следната голема парада на планети ќе се случи веќе на 28 август. Во него ќе „учествуваат“ Меркур, Марс, Јупитер, Сатурн, Уран и Нептун.
