Во термоелектраната Такетојо во префектурата Аичи во централна Јапонија денеска избувна голем пожар, соопшти нејзиниот сопственик ЈЕРА, додавајќи дека нема повредени, а работата во централата е прекината.
Јавниот сервис НХК претходно објави дека се слушнала експлозија, а очевидци забележале црн чад како се издига од термоцентралата.
Црн чад излегуваше од котларата на термоцентралата, а покрај неа гореше транспортер за јаглен. Пожарникарите се испратени на местото на настанот откако добиле повици од сведоци, објави НХК.
Електраната е управувана од ЈЕРА, водечка јапонска комунална компанија.
ЈЕРА соопшти дека во 15:14 часот по локално време (07:14 по средноевропско време), на подвижната лента со која се транспортира гориво во фабриката, бил забележан чад и пожар.
Производниот капацитет на термоелектраната Такетојо е 1.070 MW, што е меѓу најголемите во Јапонија во однос на една производна единица, се наведува на веб-страницата на ЈЕРА.
Термоелектраната се наоѓа на околу 40 километри јужно од Нагоја, најголемиот град во централна Јапонија.
