Руски воен авион се урна во Белгородската област, објави регионалниот гувернер Вјачеслав Гладков на својот канал Телеграм.
„Авионот на Министерството за одбрана се урна недалеку од градот Валујка. Службите за итна помош и екипа на истражители излегоа на местото на настанот“, напиша тој.
„Авион Су-25 на руските воздухопловни сили се урна додека се враќаше од бојното поле во регионот Белгород по завршувањето на воената мисија. Пилотот е убиен“, соопшти Министерството за одбрана, пренесува ТАСС.
Авионот се урнал во ненаселена област, но според руските медиуми изгорела штала полна со слама.
„Според првичните информации, причина за несреќата е технички дефект“, се додава во соопштението.
Како што прецизираше за ТАСС шефот на станицата за брза помош во Валујка, телото на загинатиот пилот е пронајдено и пренесено со воен хеликоптер. Екипата за брза помош се уште е на местото на несреќата. Како што рече дежурниот лекар, авионот го управувал еден пилот.
Су-25 е оклопен млазен авион дизајниран да обезбеди блиска поддршка на копнените сили на бојното поле, јуришни мисии, противтенковска борба и воздушни цели со мала брзина. Овој авион е во активна служба во Русија, а првиот прототип летал во седумдесеттите години на минатиот век.
