Саудиска Арабија домаќин на самит за украинската криза: Кина присуствува
Саудиска Арабија е домаќин на состанок во градот Џеда на кој ќе се разговара за начините за решавање на тековната руско-украинска криза. Кина сепак ќе присуствува на разговорите за Украина во Саудиска Арабија, на кои е исклучена Русија.
Како што јави Anadolu, на состанокот ќе присуствуваат советници за национална безбедност и претставници на бројни земји, објави во петокот саудиската новинска агенција SPA.
Учеството на Кина
Кина соопшти дека ќе испрати висок функционер во Саудиска Арабија на разговори овој викенд за да се најде мирно решение за војната во Украина, форум кој ја исклучува Русија.
Украинските и западните дипломати се надеваат дека на состанокот на советниците за национална безбедност и други високи функционери од околу 40 земји во Џеда ќе се договорат клучните принципи за идно мировно решение за ставање крај на руската војна во Украина.
Специјалниот претставник на Кина за евроазиски прашања Ли Хуи ќе го посети состанокот за разговори, соопшти денеска кинеското Министерство за надворешни работи.
„Кина е подготвена да работи со меѓународната заедница за да продолжи да игра конструктивна улога во промовирањето политичко решение за кризата во Украина“, изјави портпаролот на кинеското Министерство Ванг Венбин, а пренесува Бета.
Кина беше поканета на претходната рунда преговори во Копенхаген на крајот на јуни, но не присуствуваше.
Украинскиот претседател Володимир Зеленски изјави денеска дека се надева оти иницијативата ќе доведе до „мировен самит“ на лидери од целиот свет оваа есен, кои ќе ги поддржат принципите, засновани на неговата формула за решение од 10 точки.
Формулата на Зеленски вклучува почитување на територијалниот интегритет на Украина и повлекување на руските трупи.
Не се откриени повеќе детали за земјите-учеснички.
