Сајмон Харис, претседателот на либерално-конзервативната ирска партија Фајн Гаел, денеска е избран за премиер на Република Ирска, откако неговиот партиски колега Лео Варадкар претходно поднесе оставка од таа функција.
Така Харис стана најмладиот премиер во историјата на Ирска, со само 37 години.
Се очекува Харис да изврши реконструкција на Владата. Приоритет на новата ирска Влада предводена од Харис ќе биде решавање на проблемот со станбената криза, зголемувањето на цените на недвижностите и малите бизниси. Цените на недвижностите во Ирска се зголемија за 6,5% во последниот квартал, што е најбрзата стапка на раст од 2022 година.
Харис е избран за пратеник во ирскиот Парламент кога имал само 24 години, а член на Владата станал пред да наполни 30 години.
