Северна Кореја би можела да испрати до 100.000 војници за да ѝ помогне на Русија во војната против Украина, доколку соработката меѓу Пјонгјанг и Москва продолжи да се продлабочува, велат луѓе запознаени со најновите проценки на Г-20.
Ова е само една анализа на партнерството во развој меѓу рускиот претседател Владимир Путин и севернокорејскиот лидер Ким Џонг-ун, рекоа луѓето кои сакаа да останат анонимни. Тие нагласија дека таквиот развој на настаните не е неизбежен и дека воената поддршка до тој степен најверојатно ќе се случи преку ротација на војниците со текот на времето, пишува Блумберг.
На ист став е и украинскиот амбасадор
Слична оценка на почетокот на ноември даде и украинскиот амбасадор во Јужна Кореја. Дмитро Пономаренко изјави во интервју за Гласот на Америка дека Киев очекува околу 15.000 севернокорејски војници распоредени во руската област Курск, а можеби и во областите на источна Украина, да ротираат на секои неколку месеци.
Одлуката на Ким да испрати севернокорејски војници да се борат во Украина ги вознемири сојузниците на Киев, кои предупредија дека ризикува да го влоши најголемиот конфликт во Европа од Втората светска војна. Тие веруваат дека продлабочувањето на соработката меѓу Путин и Ким, исто така, може да влијае на безбедносната рамнотежа во индо-пацифичкиот регион, каде што има растечко ривалство меѓу Кина и САД.
Ова прашање ќе го покренат неколку сојузници на самитот на Г-20 во Бразил оваа недела, вклучувајќи го и германскиот канцелар Олаф Шолц, кога ќе се сретнат со кинескиот претседател Си Џинпинг. Шолц му рекол на Путин во необичен телефонски разговор во петокот дека распоредувањето на севернокорејските трупи е сериозна ескалација на војната против Украина.
Нова димензија на конфликтот
Шолц ќе изврши притисок врз кинескиот лидер на нивната средба во Рио во вторник да го искористи своето влијание врз Русија и Северна Кореја за да избегне понатамошна ескалација на војната, соопштија германските власти. Севернокорејскиот ангажман покажува дека војната станува глобална и дека Шолц и Си Џипинг ќе мора да разговараат за нова димензија на конфликтот.
Си беше најголемиот сојузник на Путин и Ким во последниве години и ги гледа двајцата лидери како партнери во потиснувањето на светскиот поредок предводен од САД. Но, неговата влада јавно молчи за испраќање севернокорејски трупи во Русија, знак дека кинескиот претседател можеби е незадоволен од договорот.
„Кина нема да седи со скрстени раце“
Партнерството Ким-Путин би можело да изврши дополнителен економски притисок врз Кина токму во моментот кога Си се подготвува за потенцијално нарушување на царините на кои се заканува новоизбраниот американски претседател Доналд Трамп кога ќе се врати во Белата куќа. Тоа, исто така, го поткопува аргументот на Пекинг дека САД не треба да формираат воени сојузи во индо-пацифичкиот регион.
– Кина не дозволува конфликти и превирања на Корејскиот полуостров и нема да седи со скрстени раце кога се загрозени нејзината стратешка безбедност и основните интереси – му рече Си на американскиот претседател Џо Бајден во саботата на маргините на самитот за азиско-пацифичка економска соработка во Лима.
Северна Кореја досега испрати повеќе од 10.000 војници да се борат заедно со војската на Путин во руската област Курск, каде што украинските сили окупираа дел од граничната територија во август. Русија за возврат испраќа пари и ѝ помага на Северна Кореја да ги зголеми своите капацитети во различни области.
Што ќе бараат за возврат?
Јужна Кореја посочи дека има добри шанси Северна Кореја да бара трансфер на напредна технологија од Русија – вклучувајќи технологија поврзана со тактичко нуклеарно оружје, интерконтинентални балистички ракети, сателити за извидување и подморници со балистички ракети.
Покрај персоналот, Северна Кореја и испрати на Русија милиони парчиња артилериска муниција и друго оружје. „Фајненшл тајмс“ оваа недела објави, цитирајќи ги украинските разузнавачки служби, дека Пјонгјанг, исто така, ја снабдува Москва со ракетни и артилериски системи со долг дострел.
Украина со месеци бара од своите сојузници да ѝ дозволат да користи западно оружје со долг дострел за да напаѓа воени цели на руска територија за да се спротивстави на нападите на Москва врз енергетската инфраструктура.
