Гувернерот на руската област Белгород, која граничи со Украина, Вјачеслав Гладков, објави дека неколку беспилотни летала го нападнале регионот ноќе. Немаше мртви или повредени. Гладков објасни дека безбедносните сили продолжуваат со „антитерористичката операција“ откако група саботери, наводно, влегле од Украина во понеделникот.
Беспилотни летала погодија куќи и владина зграда во руската област Белгород, но не предизвикаа повредени или смртни случаи, напиша регионалниот гувернер Вјачеслав Гладков на Телеграм, пренесува француската новинска агенција АФП.
Истовремено, тој објасни дека „антитерористичката операција“ продолжува во регионот и дека органите на редот продолжуваат со „чистење“ на територијата долж границата со Украина, во областа Грајворон. Според него, за време на евакуацијата во понеделникот од областа, една жена загинала, а две лица се повредени, но руските безбедносни сили не успеале да дојдат до нив. На евакуираните жители им рекол дека се уште е рано да се вратат дома.
Гладков во понеделникот објави дека група саботери од Украина влегла во регионот на Белгород и дека во судирите се ранети осум лица. Тогаш беше воведен правен антитерористички режим во регионот, давајќи им на безбедносните сили широки овластувања како што се проверка на идентитетот, надзор на комуникациите и можна евакуација на жителите од погодените области.
Одговорноста за нападот ја презеде Легијата на слободата на Русија, која себеси се опишува како милиција против Кремљ. Во видеото објавено од групата на Телеграм, маскиран претставник објаснува дека нападнале две населби. Во исто време, тој рече: „Русија ќе биде слободна!“, што е парола што често се слуша меѓу руските опозициски активисти.
Од почетокот на војната, Белгородската област на границата со Украина неколку пати беше цел на гранатирање, при што неколку луѓе беа убиени и ранети.
