Рускиот министер за одбрана Сергеј Шојгу денеска изјави дека неговите сили одржуваат „активна одбрана“ од украинската контраофанзива и дека Москва „нема друга опција“ освен да победи.
Шојгу рече дека есенската кампања сега е во тек и во коментар за новинарот на државната ТВ Росија-1 призна дека ситуацијата на фронтот е тешка на места.
„Силите одржуваат активна одбрана на неопходните важни фронтови. На некои места е потешко, на други е полесно. Но, можам да кажам дека момците и командантот работат самоуверено и сигурно бранејќи го она што треба да го одбраниме во овој момент – оние места, очигледно, до кои украинските вооружени сили се обидуваат да се пробијат“, рече Шојгу.
Тој објасни дека главната задача е да се уништи непријателското оружје.
Русија контролира речиси една петтина од територијата на Украина по повеќе од 18 месеци војна, но е принудена да се повлече од големите делови на територијата што ја зазеде при нејзината првична инвазија во близина на главниот град Киев и на југ и исток.
Во јуни Украина ја започна долгоочекуваната контраофанзива која врати повеќе од десет села, но настанаа компликации поради огромните мински полиња и силно обезбедените позиции на руските сили.
На прашањето дали Русија ќе победи, Шојгу одговори: „Немаме друга опција“.
