Руски пилот пребегна во украинската армија минатиот месец и откри детали за прекуграничната операција во неговиот борбен хеликоптер Ми8 во интервју објавено од украинската одбранбена разузнавачка служба.Пилотот Максим Кузминов, како што го нарекоа украинските власти, во интервју објасни како го планирал своето бегство и зошто го направил тоа.
„Контактирав со претставници на украинската разузнавачка служба, ја објаснив мојата ситуација и тие ми ја понудија оваа опција: „Ја гарантираме вашата безбедност, нови документи, паричен надоместок и награда“, откри пилотот во видеото објавено во понеделникот.
Шефот на Украинската одбранбена разузнавачка служба, Кирило Буданов, откри дека во август, украинските власти му помогнале на пилотот да пребега од руски во украински чинови.
„Создадовме услови целото негово семејство да ги извлече незабележано. Со него имало уште две лица, значи вкупно тричлена екипа. Кога сфатиле каде слетале, се обиделе да побегнат. За жал, тие беа елиминирани. Би сакале да ги земеме живи, но така е“, откри Буданов.
„Никој не го направил тоа досега“
Пилотот откри и како изгледала операцијата за пребегнување. „За време на еден лет сфатив дека сум блиску до границата и си помислив „ајде да пробам, не сум толку далеку“. А кога ја донесов конечната одлука, летав ниско и никој воопшто не разбираше што ми се случува“.
Тој откри дека потоа слетал во Украина каде што го пречекале украински официјални лица. Околностите на интервјуто не се јасни, но пилотот како да зборува слободно, пишува CNN.
Тогаш неофицијален руски Telegram канал, изненаден од податоците за летот, објави дека хеликоптерот Ми-8 полетал за Украина и по грешка слетал во централниот регион на Полтава.
Буданов изјави дека никој досега не го направил ова, но се надева дека таа бројка ќе се зголеми. Во интервјуто пилотот се осврна на дезинформациите што ги шират руските медиуми кои известуваат за инвазијата на Украина.
„Ова е геноцид“
„Вистината е дека овде нема нацисти или фашисти. Ова што се случува овде е вистински срам. Убиство, солзи, крв. Луѓето едноставно се убиваат едни со други. Не сакам да бидам дел од тоа“, изјави тој.
„Ова е геноцид врз украинскиот народ. И украински и руски. Мотивот за мојот чин беше да не придонесувам за овие злосторства. Украина недвосмислено ќе ја добие оваа војна само затоа што народот е многу обединет. Порано не беа такви, но сега се многу обединети. Целиот свет им помага, бидејќи пред се треба да се цени човечкиот живот“, додаде пилотот.
Пилотот, исто така, ги повика другите Руси во војската да пребегаат во Украина. „Ќе бидете згрижени до крајот на животот. Ќе ви понудат работа секаде, без разлика што правите. Едноставно ќе го откриете светот во боја“.
