Руската безбедносна служба ФСБ соопшти дека уапсила осум лица осомничени дека учествувале во организацијата на експлозивен напад на мостот на Крим, кој го поврзува анектираниот Крим со руското копно.
ФСБ соопшти дека се приведени петмина Руси и тројца украински и ерменски државјани.
Како што е наведено во ФСБ, повикувајќи се на податоците од истрагата, експлозивната направа била камуфлирана во ролни со градежна полиетиленска фолија на 22 палети со вкупна тежина од 22.770 килограми, пренесува руската агенција ТАСС.
Според тој извор, експлозивот бил испратен со брод од пристаништето Одеса во Украина до бугарското пристаниште Русе на Дунав на почетокот на август. Поминал низ пристаништето Поти во Грузија, а потоа бил испратен во Ерменија пред да стигне до Русија по пат, соопшти ФСБ.
Руската служба вели дека експлозивната направа влегла во Русија на 4 октомври во камион регистриран во Грузија пред да стигне во Русија на 6 октомври, два дена пред експлозијата; Краснодарскиот регион, кој се граничи со Крим.
ФСБ тврди дека „терористичкиот чин“ го организирала украинската воена разузнавачка служба, наведувајќи дека агент од Киев го координирал транзитот на експлозиви и бил во контакт со различни посредници.
Силна експлозија во саботата, 8 октомври, го оштети мостот на Крим кој го поврзува полуостровот анектиран од Русија со остатокот од руската територија. После тоа, железничкиот и патниот сообраќај беше делумно воспоставен на оваа витална комуникациска линија за руската армија.
Руските власти соопштија дека експлозијата ја предизвикал камион со експлозив. Како одмазда за тој напад, Русија изврши големи напади низ Украина во понеделникот и вторникот, на 10 и 11 октомври.
