Кремљ оцени дека односите со Молдавија се многу напнати и ги обвини властите во Кишињев дека водат антируска политика.
Парламентот на Молдавија минатата недела го потврди изборот на нова прозападна влада, откако претходната поднесе колективна оставка, поради бројни политички и економски скандали.
Новиот премиер Дорин Речен изјави дека неговиот кабинет ќе го продолжи проевропскиот пат и побара демилитаризација на регионот Придњестровје, чии сепаратистички власти ја уживаат поддршката на Москва.
Портпаролот на Кремљ, Дмитриј Песков, рече дека Русија се однесува „одговорно“ во однос на нејзините мировни сили во Придњестровје и и порача на Молдавија да не ја ескалира ситуацијата.
„Нашите односи со Молдавија се веќе многу напнати. Раководството секогаш се фокусира на се што е антируско, тие се лизгаат во антируска хистерија“, изјави Песков за новинарите.
Претседателката на Молдавија, Маја Санду неодамна изјави дека има разузнавачки информации кои укажуваат дека Русија планира државен удар за да ја собори владата во Кишињев и да предизвика хаос во земјата.
