Претстојните вежби со нуклеарно оружје се принуден руски одговор на западната реторика, изјави рускиот амбасадор во Вашингтон, Анатолиј Антонов.
Генералштабот на руските вооружени сили започна со подготовки за вежби за употреба на нестратегиско нуклеарно оружје, во понеделникот соопшти руското Министерство за одбрана.
– Ова е принудна мерка како одговор на арогантната и агресивна политика на колективниот Запад кој создава неприфатливи безбедносни закани за Русија и за нејзините граѓани – рече Антонов, пренесен од руските медиуми.
Амбасадорот додаде дека САД и нивните сојузници сѐ повеќе ја снабдуваат Украина со смртоносно оружје, што украинските сили можат да го користат за да извршат напади на руска територија.
Маневрите ќе се одржат во блиска иднина и во нив ќе учествуваат воздухопловните сили и морнарицата. Цел на вежбите е да се одржи подготвеноста на персоналот и опремата на единиците за борбена употреба на нестратегиско нуклеарно оружје за одговор и обезбедување на територијалниот интегритет и суверенитет на државата, соопшти руското Министерство.
