Украинската престолнина Киев беше цел на моќен руски ракетен напад. Според украинските воздухопловни сили, Русија во нападот употребила неколку хиперсонични ракети Кинжал. Синоќа беа пријавени воздушни напади и од други делови на Украина. Во меѓувреме, Полска распореди четири борбени авиони Ф-16 на својата источна граница за да го заштити својот воздушен простор во светлината на руските напади.
Киев беше цел на тежок руски ракетен напад. Според жителите, во главниот град на Украина се слушнале силни експлозии. Во неколку населби имало прекин на струја, напиша локалниот градоначалник Виталиј Кличко на социјалната мрежа Телеграм. Дистрибутерот на електрична енергија Укренерго објави дека повеќе од 250.000 луѓе останале без струја во главниот град и неговата околина.
Во нападот беа оштетени многу објекти од цивилна инфраструктура, како и гасовод. Во Киев по нападот се пријавуваат и проблеми со водоснабдувањето. Во главниот град, постара жена им подлегна на повредите во возило на брза помош, најмалку 27 лица се повредени, соопшти локалниот градоначалник Кличко. Тој додаде дека по нападите избувнале седум пожари. Министерот за внатрешни работи Игор Клименко соопшти дека две лица загинале, а седум лица се повредени во регионот на Киев.
Воздушни напади синоќа беа пријавени и од други делови на Украина, вклучувајќи го и Харков на истокот на земјата. Таму загина 91-годишна жена, а повредени се 44 лица, соопшти гувернерот на истоимениот регион Олег Сињегубов.
Неодамна, Русија го засили бомбардирањето на Украина во текот на ноќта. Рускиот претседател Владимир Путин најави зголемување на нападите.
По нападите на Украина, Полска испрати борбени авиони на границата
Во меѓувреме, Полска денеска испрати четири борбени авиони Ф-16 на својата источна граница за да го заштити својот воздушен простор по насилните руски ракетни напади врз Украина, соопшти полската армија. Како што напиша таа на социјалната мрежа Х, забележале зголемена активност на руската авијација со долг дострел, поврзана со извршување на напади на територијата на Украина.
„Со цел да се осигура безбедноста на полскиот воздушен простор, испративме два пара ловци Ф-16 и сојузнички летечки танкер во акција“, додаде таа. Загриженоста се зголеми во Полска откако руска ракета прелета над полскиот воздушен простор за време на интензивниот воздушен напад врз Украина во петокот.
