Во последните 24 часа 36 кинески авиони се забележани во околината на Тајван, соопшти тајванското Министерство за одбрана. Забележани се и шест кинески бродови.
Тајван повторно пријави зголемено присуство на кинески воени авиони во близина на самоуправниот остров. Тајванското Министерство за одбрана соопшти дека за 24 часа од четвртокот до утринава се избројани рекордни 36 кинески авиони за оваа година, од кои 13 ја минале неофицијалната централна граница во Тајванскиот теснец.
Министерството за одбрана во соопштение на мрежата Икс објави дека во ова време евидентирало и присуство на шест бродови на морнарицата на Народна Република Кина. Кинеското копно и Тајван се разделени со морски теснец долг 180 километри.
За зголеменото присуство на кинеските сили веќе беше пријавено од тајванските власти во четвртокот, кога во 24-часовен прозорец избројаа 32 кинески авиони.
Иако Тајван работи независно од кинеското копно од крајот на граѓанската војна во 1949 година, Пекинг продолжува да го смета островот за дел од својата територија според политиката „Една Кина“. Додека кинескиот претседател Си Џинпинг отворено зборува за повторно обединување на островот со копното, а некои од политичките сили на Тајван зборуваат за независност, анкетите на островот покажуваат дека повеќето Тајванци сè уште сакаат да го задржат статус квото, а со тоа и мирот.
