Украинската војска објави дека уништила 24 беспилотни летала кои руските сили ги лансирале на украинска територија од полуостровот Крим во текот на ноќта. Притоа бил погоден инфраструктурен објект. Русија, сепак, пријави напади од украински беспилотни летала на западот на земјата, оштетувајќи ја инфраструктурата и предизвикувајќи прекини на електричната енергија.
Според украинската војска, нејзината противвоздушна одбрана соборила 24 од вкупно 29 беспилотни летала од иранско производство, лансирани од руските сили од украинскиот полуостров Крим, кој Русија го анектираше во 2014 година, за време на новиот напад. Беспилотните летала беа уништени над регионите на Одеса, Миколаив и Кировоград во централниот и јужниот дел на земјата, објаснија тие.
Надлежните украински воени претставници тврдат дека Русија „продолжува со напорите да ги уништи пристаништата и другата инфраструктура“ во јужна Украина.
Во реонот на Кировоград, во нападот бил погоден инфраструктурен објект, ја информирал јавноста на Телеграм регионалниот гувернер, додавајќи дека инцидентот нема жртви.
Киев постојано предупредуваше за нов бран руски воздушни напади врз енергетската инфраструктура на Украина пред зимата, а Москва, исто така, неодамна ги засили своите напади врз украинските пристаништа.
Во меѓувреме, руските власти соопштија дека поради нападите на украинските беспилотни летала дошло до прекин на електричната енергија во многу градови во западната руска област Курск. Гувернерот на Курск, Роман Старовојт, на Телеграм објави дека биле нападнати инфраструктурни објекти во областите Сужа, Кореново и Глушково. Сите три области се граничат со Украина.
Според информативниот канал „Шот“ на Телеграм, биле погодени трансформаторските станици во Сужа и Глушков, што резултирало со прекин на електричната енергија во 67 градови. Дека има прекини во струја потврди и гувернерот Старовојт, но не прецизираше поконкретни бројки.
Според гувернерот, градот Рилск, кој се наоѓа во близина на границата со Украина, бил цел на гранатирање со касетна муниција, при што е повредено едно лице и оштетени неколку куќи и возила.
